Yaxınlarda "Alkorkon"dan "Albasete"yə keçən Eddi İsrafilov millinin AVRO-2020-nin seçmə mərhələsi çərçivəsində Uelslə səfər, Xorvatiya ilə ev oyunlarına dəvət almayıb. Nikola Yurçeviç zədəsini yenicə sağaltdığı üçün yarımmüdafiəçini yığmanın düşərgəsinə çağırmadığını bildirib. Milliləşdirilən futbolçunun ölkəmizin bir nömrəli komandasından kənarda qalmasının səbəbi başqadır. İsrafilov AFFA-dan ona çatacaq pulu tələb edir. Məsələ ondadır ki, federasiya 2015-ci ildə Azərbaycan yığmasını seçməsi müqabilində Eddiyə müəyyən məbləğ "boyun olub". Qurum həmin vəsaiti hələ tam ödəməyib. İsrafilova çatacaq məbləğdən 300 min dolları qalıb. AFFA rəsmiləri 27 yaşlı oyunçunu dilə tutsa da, o, pulunu almayanadək geri dönməyəcəyini bildirib.