Baki 27°C
“Azərbaycan tərəfi Qarabağda əks-əməliyyatlara başlayanda məlum oldu ki, Ermənistanın pilotsuz uçuş aparatlarını zərərsizləşdirmək üçün radioelektron sistemləri yoxdur”. Bunu Rusiyanın "Kommersant" nəşrinin siyasi şərhçisi Maksim Yusin iddia edib. O bildirib ki, guya Ermənistanın baş naziri Nikol Paşinyan Moskvanın təklif etdiyi bu tipli komplekslərdən imtana edib.
Azərbaycan Müdafiə Nazirliyi oktyabrın 9-da Qarabağ ərazisində Ermənistana məxsus radioelektron mübarizə vasitələrinin məhv edilməsinə dair görüntü yayıb. Bir gün sonra isə Müdafiə Nazirliyi Xocalı rayonu ərazisində Ermənistan ordusuna aid bahalı 19J6 (ST-68U) radilokasiya stansiyasının məhv edildiyini açıqlayıb.
Qeyd edək ki, bu üç koordinatlı radar stansiyası qanadlı raketlər də daxil olmaqla, aşağı hündürlükdəki hədəfləri aşkar edə bilir. Bir dəfəyə 32 hədəfi izləmək imkanı olan bu sistemin modernləşdirilmiş versiyasının hava obyektlərini aşkarlama məsafəsi 250 kilometrə qədər artırılıb.
Bundan başqa rəsmi Bakı ermənilərə məxsus 1 aşkaretmə stansiyası və bir lakatoru sıradan çıxardığını açıqlayıb. Həmçinin Azərbaycan tərəfi Ermənistan ordusuna aid 6 S-300 zenit-raket sisteminin məhv edildiyini bəyan edib. Bu barədə Azərbaycan prezidenti İlham Əliyev xalqa müraciətində məlumat verib. Azərbaycan Müdafiə Nazirliyi bununla bağlı müxtəlif vaxtlarda video yayımlayıb. Yeri gəlmişkən, Rusiya istehsalı olan S-300 zenit raket sistemi hədəfləri 47 km-dən 150 kilometrə qədər məsafədə vurma, hava obyektlərini 120 km-dən 300 km-ə qədər məsafədə aşkar etmək imkanına malikdir.
Kompleksin hava obyektlərinin aşkar edilməsinin uzaqlığı 120-dən 300 kilometrədəkdir. Hədəfin məhv edilməsi yüksəkliyi isə maksimum 27 km-dir. Bu raketlər saniyədə 2800 metrə kimi sürətlə hərəkət edən hədəfləri məhv etməyə qadirdir. Sistem eyni zamanda aktiv və passiv maneələrə qarşı qoruma imkanına malikdir. Ermənistanın Rusiyadan S-300 zenit-raket kompleksi əldə etməsinə dair açıq mənbələrdə məlumatlar qeydə alınıb. Bundan başqa Ermənistan Müdafiə Nazirliyi S-300 zenit-raket komplekslərinin hava -hücumundan müdafiə qüvvələrinin təlimlərində iştirak etdiyinə dair məlumat yayıb. Bu komplekslərin təlimdə və paradda iştirakına dair görüntülər də təqdim edilib.
Bundan başqa rəsmi Bakı Ermənistan ordusuna məxsus 4 “TOR” zenit-raket kompleksinin məhv edildiyini açıqlayıb. Rusiya istehsalı olan bu sistemin istənilən hava şəraitində aşağı və orta hündürlükdə uçuş həyata keçirən təyyarə, helikopter, qanadlı raket, yüksək dəqiqlikli idarəolunan raketlər, pilotsuz uçuş aparatları və qısa mənzilli ballistik raketlərə qarşı mübarizə aparmaq imkanına malik olduğu məlumdur.
Bu sistem yüksək dəqiqliklə idarəolunan raketləri gecə və gündüz, istənilən hava şəraitində və radioelektron mübarizə mühitində məhv etməyi bacaran hava hücumundan müdafiə sistemi hesab olunur. Ermənstanın ТОР-М2КМ zenit-raket kompleksi əldə etdiyinə dair hələ 2019-cu ilin dekabr ayında bu ölkənin baş naziri Nikol Paşinyan feysbuk səhifəsi vasitəsilə məlumat verib. O kompleksin yanında selfi çəkərək paylaşmışdı.
Bəzi açıq mənbələrdə Ermənistanın Rusiyadan "İnfauna", R 325 U, R-330B radioelektron mübarizə sistemləri tədarük etdiyi də əksini tapıb.
Ermənistanın Rusiydan Бук-М2 zenit-raket kompleksi əldə etdiyi də məlumdur. Bu kompleks pilotsuz uçuş aparatlarını da sıradan çıxarır. Hələ 2008-ci il may ayının əvvəllərində Abxaz separatçılarının bu kompleks vasitəsilə Gürcüstan Hərbi Hava Qüvvələrinə məxsus dörd ədəd pilotsuz uçuş aparatını məhv etdiyinə dair məlumat yayılmışdı.
2018-ci ildə isə Ermənistan Rusiyadan məhz pilotsuz uçuş aparatları ilə mübarizə üçün nəzərdə tutulan Repellent radioelektron qurğu alıb. Bu qurğu 5-10 km məsafədə olan pilotsuz təyyarələri aşkar etmək və onu sıradan çıxarmaq imkanına malikdir.
Amma bəzi Rusiya mənbələrində ən inkişaf etmiş elektron mübarizə vasitələrindən olan “Repellent”in Azərbaycan ordusuna məxsus dronla məhv edildiyinə dair məlumat yayılmışdı.
Göründüyü kimi, deyilənlərin əksinə olaraq Ermənistan müxtəlif vaxtlarda Rusiyadan həm radioelektron mübarizə vasitələri, həmçinin pilotsuz uçuş aparatlarını zərərsizləşdirmək imkanına malik olan zenit-raket kompleksləri əldə edib.
Saxta.info bu nəticəyə gəlib ki, Rusiyanın "Kommersant" nəşrinin siyasi şərhçisi Maksim Yusinin iddiası doğru deyil.
