Ermənistan “Pralay” raketləri alır? – Hindistanla mümkün razılaşma regionda diqqət çəkdi-
Ermənistanın Hindistan istehsalı olan hərbi sistemlərə marağını genişləndirməsi fonunda İrəvanın “Pralay” taktiki raketlərini əldə edə biləcəyi ilə bağlı məlumatlar yenidən gündəmə gəlib.
Azmedia.Az xəbər verir ki, Hindistanın müdafiə məsələləri üzrə ixtisaslaşmış “Indian Defence Research Wing” portalında yayılan məlumatda Hindistan Müdafiə Nazirliyinin nümayəndəsi Raceş Kumarın Ermənistana səfəri zamanı mümkün raket tədarükünün də müzakirə mövzularından biri olduğu bildirilib.
Məlumata görə, görüşlər çərçivəsində yeni nəsil raket sistemləri ilə yanaşı, birgə müəssisələrin yaradılması, müdafiə sənayesi sahəsində əməkdaşlığın genişləndirilməsi və Hindistan istehsalı digər hərbi texnikaların Ermənistana mümkün tədarükü məsələləri nəzərdən keçirilib.
Ermənistan artıq Hindistanın bir sıra müdafiə sistemlərini, o cümlədən “Pinaka”, “Akash”, ATAGS və “Swathi” komplekslərini əldə edib. Yeni mərhələdə isə İrəvanın daha uzaqmənzilli və yüksək dəqiqlikli zərbə imkanlarına malik sistemlərlə maraqlandığı qeyd olunur.
“Pralay” nədir?
“Pralay” Hindistan Müdafiə Tədqiqatları və İnkişafı Təşkilatı (DRDO) tərəfindən hazırlanmış, mobil platformadan buraxılan yer-yer tipli kvaziballistik raket sistemidir.
Açıq mənbələrdə raketin müxtəlif versiyalarının təxminən 150-500 kilometr məsafədə fəaliyyət göstərə bildiyi qeyd edilir. Ermənistan üçün isə ixrac məhdudiyyətləri nəzərə alınmaqla, təxminən 290 kilometrlik variantın nəzərdən keçirilə biləcəyi bildirilir.
Sistemin əsas xüsusiyyətlərindən biri uçuş zamanı trayektoriyasını dəyişmək imkanına malik olmasıdır. Mobil buraxılış qurğusundan istifadə edilməsi isə raketin mövqeyinin qısa müddətdə dəyişdirilməsinə imkan verir.
Region üçün hansı nəticələr yarada bilər?
Ermənistanın belə bir raket sistemini əldə etməsi Cənubi Qafqazda uzaqmənzilli yüksək dəqiqlikli zərbə imkanları ilə bağlı müzakirələri gücləndirə bilər. Bununla belə, yalnız raketin texniki göstəricilərinə əsaslanaraq onun avtomatik şəkildə ciddi hərbi üstünlük yaradacağını söyləmək doğru olmaz.
“Pralay” kimi sistemlərin real döyüş effektivliyi raketin sayından və mənzilindən əlavə, kəşfiyyat, hədəflərin müəyyənləşdirilməsi, məlumat mübadiləsi və komanda-idarəetmə imkanları ilə inteqrasiyadan da əhəmiyyətli dərəcədə asılıdır.
Bu baxımdan Ermənistanın həmin sistemə mümkün marağı daha çox uzaqmənzilli və yüksək dəqiqlikli zərbə potensialının artırılması istiqamətində atılan addım kimi qiymətləndirilə bilər.
Eyni zamanda, söhbətin hazırda mümkün tədarük və danışıqlardan getdiyi, raketlərin Ermənistana artıq verildiyini təsdiqləyən rəsmi məlumatın isə təqdim olunmadığı nəzərə alınmalıdır.
///Baku.ws
