Oktyabrda hava sürprizi: Kəlbəcərə qar, Yardımlıya iri dolu düşdü

Azərbaycanın bir sıra bölgələrində yağıntılı hava müşahidə olunub. Bəzi ərazilərdə intensiv leysan və şimşək qeydə alındığı halda, yüksək dağlıq ərazilərə qar yağıb, Yardımlıda isə diametri 20 millimetrə çatan dolu düşüb.

Azmedia.Az xəbər verir ki, Milli Hidrometeorologiya Xidmətinin 10 oktyabr saat 10:00-a olan məlumatında ölkənin müxtəlif ərazilərində müşahidə edilən faktiki hava şəraiti açıqlanıb.

Məlumata əsasən, bəzi yerlərdə arabir yağış və qar yağıb. Ayrı-ayrı ərazilərdə leysan xarakterli intensiv və güclü yağıntılar müşahidə olunub, şimşək çaxıb.

Şahdağla yanaşı, Kəlbəcər, Laçın, Daşkəsən və Gədəbəy rayonlarının yüksək dağlıq ərazilərində qar qeydə alınıb.

Bakı və Abşeronda yağıntının miqdarı

Paytaxt və Abşeron yarımadasında yağıntının miqdarı ərazilər üzrə fərqlənib. Ən çox yağıntı Neft Daşlarında qeydə alınıb.

Neft Daşları — 26 mm (aylıq normanın 139%-i);

Sumqayıt — 3 mm;

Bakı, Binə və Pirallahı — 2 mm;

Maştağa — 1 mm-dək.

Rayonlarda qeydə alınan yağıntılar

Respublikanın digər ərazilərində də müxtəlif miqdarda yağıntı düşüb. Milli Hidrometeorologiya Xidmətinin məlumatına görə:

Göygöl — 16 mm;

İmişli və Şəkinin Kişçay ərazisi — 10 mm;

Balakən və Qaxın Sarıbaş ərazisi — 6 mm;

Biləsuvar və Sabirabad — 5 mm.

Şirvan, Qobustan, Beyləqan, Zaqatala, Goranboy, Gədəbəy, Ordubad, Tovuz, Naxçıvan, Sədərək, Quba, Qusar, Şabran, Xızı, Neftçala, Astara, Ağdam, Cəbrayıl, Şamaxı, Kürdəmir, Naftalan, Zərdab, Tərtər, Bərdə, Hacıqabul və Salyanda isə yağıntının miqdarı 1–4 mm arasında dəyişib.

Qubadlı, Şuşa və Füzuli rayonlarında qısamüddətli yağış yağıb.

Yardımlıda dolu düşüb

Yardımlı rayonunda oktyabrın 10-da saat 08:15-dən 08:27-dək davam edən güclü leysan yağışı ilə yanaşı dolu da müşahidə olunub. Dolu dənələrinin diametri 18–20 millimetr təşkil edib.