2027-ci ilin büdcəsi dəyişdirildi: gəlirlər 20 milyon manat artırıldı
Azərbaycanın 2027-ci il üçün dövlət büdcəsinin gəlirləri ilkin variantla müqayisədə 20 milyon manat artırılıb. İcmal büdcənin gəlir və xərc göstəricilərində də dəyişiklik edilib.
Azmedia.Az xəbər verir ki, Azərbaycanın 2027-ci il üçün dövlət büdcəsinin gəlirləri ilkin variantla müqayisədə 20 milyon manat artırılıb. Bu dəyişiklik Maliyyə Nazirliyinin növbəti dörd il üçün açıqladığı Ortamüddətli Xərclər Çərçivəsində əksini tapıb.
Sənədə əsasən, gələn il dövlət büdcəsinin gəlirlərinin 39 milyard 254 milyon manat təşkil edəcəyi gözlənilir. Bu göstərici 2026-cı il üçün təsdiq olunmuş proqnozla müqayisədə 1,7 faiz çoxdur.
Dövlət büdcəsinin xərclərinin isə ilkin variantda nəzərdə tutulduğu kimi, 42 milyard 400 milyon manat olacağı proqnozlaşdırılır. Bu məbləğ 2026-cı ilin təsdiq edilmiş proqnozundan 1,7 faiz çoxdur.
Nəticədə dövlət büdcəsində 3 milyard 146 milyon manat kəsirin yaranacağı gözlənilir. Bu, illik müqayisədə 1,7 faiz artım deməkdir.
2027-ci ildə Azərbaycanın icmal büdcəsinin gəlirlərinin ilkin variantla müqayisədə 10,4 milyon manat artırılaraq 47 milyard 619,2 milyon manata çatacağı proqnozlaşdırılır. İcmal büdcənin xərclərinin isə 9,6 milyon manat azaldılaraq 50 milyard 377,1 milyon manat səviyyəsində olacağı gözlənilir.
Qeyd olunan gəlir və xərc göstəriciləri 2026-cı il üçün təsdiq edilmiş proqnozlarla müqayisədə müvafiq olaraq 5,9 faiz və 3,1 faiz çoxdur.
Beləliklə, 2027-ci ildə icmal büdcədə 2 milyard 757,9 milyon manat kəsirin yaranacağı nəzərdə tutulur. Bu göstərici illik müqayisədə 28,7 faiz azdır.
