27 Sentyabr – Anım Günüdür: 44 günlük Vətən müharibəsindən sülh sənədinə gedən yol
Bu gün – 27 Sentyabr Azərbaycanda Anım Günü kimi qeyd olunur. Altı il əvvəl, 2020-ci il sentyabrın 27-də başlayan 44 günlük Vətən müharibəsi Azərbaycanın müasir tarixinin mühüm hadisələrindən biri kimi yadda qalıb. Müharibə nəticəsində Azərbaycanın ərazi bütövlüyü bərpa edilib, şəhidlərin xatirəsinin əbədiləşdirilməsi məqsədilə isə 27 sentyabr Anım Günü elan olunub.
Azmedia.Az xəbər verir ki, 2020-ci il sentyabrın 27-də Ermənistan silahlı qüvvələrinin Azərbaycan Ordusunun mövqelərinə və yaşayış məntəqələrinə atəş açmasından sonra Azərbaycan Silahlı Qüvvələri əks-hücum əməliyyatlarına başlayıb. Həmin gün Prezident, Silahlı Qüvvələrin Ali Baş Komandanı İlham Əliyevin rəhbərliyi ilə ordunun qarşısında Azərbaycanın ərazi bütövlüyünün bərpası istiqamətində hərbi əməliyyatların aparılması vəzifəsi dayanıb.
44 gün davam edən Vətən müharibəsi nəticəsində Azərbaycan Ordusu bir sıra yaşayış məntəqələrini və strateji yüksəklikləri nəzarətə götürüb. Müharibənin gedişində Cəbrayıl, Füzuli, Zəngilan, Qubadlı və Şuşa şəhərləri, həmçinin bir sıra rayonların kənd və qəsəbələri azad edilib.
Rəsmi məlumatlara əsasən, Vətən müharibəsi 2020-ci il sentyabrın 27-dən noyabrın 10-dək davam edib. Prezident İlham Əliyevin 2020-ci il 2 dekabr tarixli Sərəncamında da həmin dövrdə Azərbaycan xalqının və Silahlı Qüvvələrinin göstərdiyi birlik və fədakarlıq xüsusi qeyd olunur.
44 günlük müharibənin nəticələri
Vətən müharibəsi zamanı Cəbrayıl şəhəri və rayonun 90 kəndi, Füzuli şəhəri və rayonun 53 kəndi, Zəngilan şəhəri, Mincivan, Ağbənd və Bartaz qəsəbələri və rayonun 52 kəndi, Xocavənd rayonunun Hadrut qəsəbəsi və 35 kəndi, Tərtər rayonunun Talış, Suqovuşan və Çaylı kəndləri, Qubadlı şəhəri və rayonun 41 kəndi, Xocalı rayonunun 9 kəndi, Şuşa şəhəri, Laçın rayonunun 3 kəndi, həmçinin Ağdərə və Murovdağ istiqamətlərində bir sıra strateji yüksəkliklər Azərbaycan Ordusunun nəzarətinə keçib.
Zəngilan istiqamətində Bartaz, Sığırt və Şükürataz yüksəklikləri, eləcə də daha beş adsız yüksəklik də azad edilib.
Müharibə zamanı Azərbaycan tərəfi həmçinin hərbi texnika və digər hərbi vasitələrdən ibarət qənimətlər əldə edib. Bu qənimətlərin bir hissəsi hazırda Bakıda yerləşən Hərbi Qənimətlər Parkında nümayiş etdirilir.
10 noyabr bəyanatı
2020-ci il noyabrın 10-da Azərbaycan Prezidenti İlham Əliyev, Ermənistanın baş naziri Nikol Paşinyan və Rusiya Prezidenti Vladimir Putin atəşin və bütün hərbi əməliyyatların dayandırılması barədə üçtərəfli bəyanat imzalayıblar.
Bəyanata əsasən, Kəlbəcər, Ağdam və Laçın rayonlarının Azərbaycana qaytarılması nəzərdə tutulub. Bununla da Vətən müharibəsində hərbi əməliyyatlar dayandırılıb və regionda yeni mərhələ başlayıb.
Müharibədən sülh prosesinə
Vətən müharibəsindən sonrakı dövrdə Azərbaycan və Ermənistan arasında münasibətlərin normallaşdırılması və sülh gündəliyi üzrə danışıqlar davam etdirilib.
2025-ci il avqustun 8-də Vaşinqtonda Azərbaycan Prezidenti İlham Əliyev, ABŞ Prezidenti Donald Tramp və Ermənistanın baş naziri Nikol Paşinyanın iştirakı ilə keçirilən görüş çərçivəsində Azərbaycan və Ermənistanın xarici işlər nazirləri “Azərbaycan Respublikası və Ermənistan Respublikası arasında sülhün və dövlətlərarası münasibətlərin təsis edilməsinə dair Saziş” layihəsini paraflayıblar. Həmin tədbirdə Azərbaycan və Ermənistan arasında münasibətlərin normallaşdırılması ilə bağlı Birgə Bəyannamə də imzalanıb.
2908 şəhid, 6 itkin
Azərbaycan Respublikası Müdafiə Nazirliyinin 2021-ci ildə açıqladığı məlumatda Vətən müharibəsində şəhid olmuş və həmin tarixədək dəfn edilmiş 2908 hərbi qulluqçunun, həmçinin itkin hesab olunan 6 hərbçinin məlumatlarının təqdim edildiyi bildirilib.
Vətən müharibəsi Azərbaycan cəmiyyətində şəhidlərin xatirəsinin daim yaşadılması, şəhid ailələrinə və qazilərə ehtiram göstərilməsi ilə bağlı geniş yaddaşın formalaşmasına səbəb olub.
27 Sentyabr – Anım Günü
Prezident İlham Əliyev 2020-ci il dekabrın 2-də “Azərbaycan Respublikasında Anım Gününün təsis edilməsi haqqında” Sərəncam imzalayıb.
Sərəncama əsasən, hər il 27 sentyabr Azərbaycan Respublikasında Anım Günü kimi qeyd edilir. Sənəddə Azərbaycanın suverenliyi və ərazi bütövlüyü uğrunda mübarizədə şəhid olan hərbçilərin xatirəsinə ehtiram göstərilməsi əsas məqsədlərdən biri kimi müəyyənləşdirilib.
Anım Günü ilə əlaqədar hər il ölkə üzrə müxtəlif tədbirlər keçirilir, şəhidlərin məzarları və memorial komplekslər ziyarət olunur. Azərbaycanın xaricdəki diplomatik nümayəndəlikləri və müxtəlif təşkilatlar tərəfindən də anım tədbirləri təşkil edilir.
Anım Günündə şəhidlərimizin xatirəsi dini məbədlərdə – məscidlərdə, kilsələrdə və sinaqoqlarda da yad olunur, onların ruhuna dualar oxunur.
Saat 12:00-da isə ölkə ərazisində Vətən müharibəsi şəhidlərinin əziz xatirəsi bir dəqiqəlik sükutla yad edilir. Bu qayda Anım Gününün mahiyyətinə uyğun olaraq qanunvericilikdə də əksini tapıb.
27 Sentyabr – Anım Günü Azərbaycan xalqının Vətən müharibəsində həyatını itirən şəhidlərin xatirəsini ehtiramla yad etdiyi tarixdir.
Azmedia.Az olaraq Vətən müharibəsində şəhid olan bütün qəhrəmanlarımızın əziz xatirəsini dərin hörmət və ehtiramla yad edirik.
