12 gün davam edən nəhəng tıxac: Çində yollar necə avtomobil dayanacağına çevrildi?
2010-cu ilin avqustunda Çində baş verən nəhəng yol tıxacı minlərlə avtomobili günlərlə hərəkətsiz vəziyyətdə qoydu. 100 kilometrdən artıq məsafəyə yayılan sıxlıq bəzi sürücülərin günlərlə yolda qalmasına səbəb oldu.
Azmedia.Az xəbər verir ki, hadisə 14 avqust 2010-cu ildə Pekin-Tibet magistralının və G110 milli yolunun bir sıra hissələrində yaranmağa başlayıb.
Sıxlıq xüsusilə Hebey əyaləti ilə Daxili Monqolustan arasında uzanan marşrutda ciddi problemə çevrilib. Minlərlə avtomobilin iştirak etdiyi tıxacın uzunluğu 100 kilometrdən çox olub və nəqliyyatın hərəkəti günlərlə son dərəcə aşağı sürətlə davam edib. Bəzi avtomobillərin sutka ərzində cəmi bir kilometr irəliləyə bildiyi barədə məlumatlar yayılıb.
Tıxacın əsas səbəbi nə idi?
Hadisənin yaranmasına bir neçə amilin eyni vaxtda təsir etdiyi bildirilirdi.
Əsas səbəblərdən biri G110 milli yolunda aparılan təmir işləri olub. Təmir nəticəsində magistralın buraxılış qabiliyyəti əhəmiyyətli dərəcədə azalmışdı.
Digər tərəfdən, Daxili Monqolustandan Pekin istiqamətində hərəkət edən ağır yük maşınlarının sayının kəskin artması yoldakı vəziyyəti daha da çətinləşdirib. Xüsusilə kömür daşınması ilə məşğul olan yük avtomobillərinin çoxluğu nəqliyyat axınına ciddi yük yaradıb. Həmin dövrdə yolun faktiki nəqliyyat yükünün layihə üzrə nəzərdə tutulan tutumdan təxminən 60 faiz çox olduğu bildirilirdi.
Bununla yanaşı, avtomobillərin sıradan çıxması və kiçik yol-nəqliyyat hadisələri də onsuz da ağır olan vəziyyəti daha da mürəkkəbləşdirib.
Yol kənarında müvəqqəti bazarlar yarandı
Sürücülərin günlərlə yolda qalması ətraf ərazilərdə yaşayan insanların da diqqətini bu vəziyyətə yönəldib.
Su və ərzağa tələbatın artmasından sonra yerli sakinlər magistral boyunca müxtəlif məhsullar satmağa başlayıblar. Beləliklə, nəhəng tıxacın olduğu ərazidə bir növ müvəqqəti ticarət mühiti formalaşıb.
Məlumatlara görə, normalda 1 yuana satılan su bəzi yerlərdə 15 yuana qədər təklif olunurdu. Hazır əriştə və digər ərzaq məhsullarının qiyməti də adi qiymətlərlə müqayisədə bir neçə dəfə artmışdı. Bəzi satıcılar məhsulları velosipedlərlə avtomobillərin arasında gəzərək sürücülərə çatdırırdılar.
Sürücülər vaxtlarını necə keçirirdi?
Nəqliyyatın saatlarla, hətta günlərlə hərəkətsiz qalması sürücülərin gündəlik həyatını da dəyişmişdi.
Uzun müddət yolda qalan insanlar avtomobillərinin yanında gözləyir, yatır, ərazidə gəzir, kart və şahmat oynayırdılar. Həmin günlərdə yayılan reportajlarda magistralın bəzi hissələrinin adi avtomobil yolundan daha çox nəhəng dayanacağı xatırlatdığı qeyd olunurdu.
Əraziyə yüzlərlə polis cəlb edildi
Vəziyyətin daha da ağırlaşmasının qarşısını almaq üçün əraziyə təxminən 400 polis əməkdaşı cəlb edilmişdi.
Səlahiyyətlilər nəqliyyat axınını tənzimləməyə, yük maşınlarının hərəkətini nizamlamağa və tıxacın aradan qaldırılması üçün alternativ yolların istifadəsinə çalışırdılar. Yük avtomobillərinin Pekinə girişinin, xüsusilə gecə saatlarında artırılması və bəzi yükdaşıma şirkətlərinin fəaliyyətlərini müvəqqəti dayandırması və ya alternativ marşrutlardan istifadə etməsi də müzakirə olunurdu.
Avqustun 26-da vəziyyət nisbətən normallaşdı
Avqustun 26-na doğru əsas tıxacın böyük hissəsi aradan qalxmışdı. Lakin problem bununla tam bitməyib.
Bir neçə gün sonra eyni magistralın ayrı-ayrı hissələrində qəza və yol təmiri ilə əlaqədar yenidən uzunmüddətli sıxlıq yaranıb. Beləliklə, 2010-cu ilin avqustunda Çin yollarında yaşanan nəqliyyat böhranı ayrı-ayrı mərhələlərlə davam edib.
2010-cu ildə Çində baş verən bu hadisə 100 kilometrdən artıq məsafəyə yayılan və 12 gün davam edən ən uzunmüddətli yol tıxaclarından biri kimi nəqliyyat tarixində yadda qalıb.
