İndoneziyada 243 nəfərin olduğu bərə batdı: 1 nəfər ölüb, 103 nəfər xilas edilib

İndoneziyada Yava dənizində hərəkətdə olan sərnişin bərəsinin batması nəticəsində bir nəfər həyatını itirib, 103 nəfər isə xilas edilib.

Azmedia.Az xəbər verir ki, hadisə Yava və Borneo adaları arasında hərəkət edən “Virgo Transport 8” bərəsində baş verib.

Yerli axtarış-xilasetmə xidmətinin rəhbəri İ Putu Sudayana bildirib ki, gəmidə ümumilikdə 243 sərnişin və ekipaj üzvü olub. Bərə Şərqi Yavanın Surabaya şəhərindən Banjarmasin istiqamətində hərəkət edərkən hava şəraiti kəskin pisləşib.

Məlumata əsasən, gəmi ilə əlaqə yerli vaxtla saat 02:00 radələrində itib. Hadisə zamanı bölgədə güclü fırtına müşahidə olunub.

Xilasedicilər axtarış işləri zamanı hündürlüyü 2,5 metrə (8,2 fut) çatan dalğalarla mübarizə aparıblar.

Son məlumatlara görə, hadisə nəticəsində 1 nəfər ölüb, 103 nəfər xilas edilib. Digər şəxslərin taleyinin müəyyənləşdirilməsi istiqamətində axtarış-xilasetmə əməliyyatı davam etdirilir.

Gəminin sonuncu dəfə Banjarmasində yerləşən “SAR Basirih” körpüsündən təxminən 80 dəniz mili məsafədə olduğu müəyyənləşdirilib.

Əməliyyata dəniz qüvvələri, su polisi, liman və naviqasiya xidmətlərinin əməkdaşları cəlb olunub.