Uşağını döyən valideynlər CƏRİMƏLƏNƏCƏK
Milli Məclisin son qərarı ilə uşaqların tərbiyəsində "fiziki cəza" üsuluna son qoyulur və artıq övladına əl qaldıranları ciddi cərimələr gözləyir. İnzibati Xətalar Məcəlləsinə edilən yeni dəyişiklik uşağa qarşı istənilən növ zorakılığın qanunla cəzalandırılacağını rəsmiləşdirib.
Azmedia.Az xəbər verir ki, bu gün keçirilən plenar iclasda qəbul edilən qanun layihəsi uşaq hüquqlarının müdafiəsində yeni mərhələ hesab olunur.
Yeni qaydalara əsasən, təkcə valideynlər deyil, həm də uşaqların təlim-tərbiyəsi ilə məşğul olan şəxslər məsuliyyətə cəlb ediləcək. Bura müəllimlər, həkimlər, idman məşqçiləri, mədəniyyət və sosial xidmət müəssisələrinin əməkdaşları daxildir. Əgər bu şəxslər uşağı "tərbiyə etmək" və ya intizam yaratmaq adı ilə fiziki və ya psixoloji təzyiqə məruz qoysalar, 200 manat məbləğində cərimə olunacaqlar.
Lakin bir məqamı unutmaq olmaz. Əgər törədilən əməl daha ağır xarakter daşıyırsa və Cinayət Məcəlləsinin maddələri ilə tənzimlənirsə, bu zaman inzibati cərimə deyil, birbaşa cinayət məsuliyyəti yaranacaq. Millət vəkilləri tərəfindən geniş müzakirə olunan layihə üçüncü oxunuşda yekdilliklə qəbul edilib.
Yəni, artıq uşaqları döymək və ya onlara psixoloji təzyiq göstərmək qanunla qadağan edilir; valideynlər və tərbiyəçilər belə hallara görə dövlət tərəfindən cərimələnəcəklər.
