“Mançester Siti” tarixə düşdü: “Old Trafford”da 10 nəfərlə “Mançester Yunayted”ə qalib gələn ikinci komanda oldu

“Mançester Siti” “Old Trafford”da bir futbolçusunun qırmızı vərəqə almasına baxmayaraq “Mançester Yunayted” üzərində qələbə qazandı.

Azmedia.Az xəbər verir ki, “Mançester Siti” İngiltərə Premyer Liqası tarixində “Old Trafford”da bir oyunçusu qırmızı vərəqə aldıqdan sonra “Mançester Yunayted”i məğlub edən yalnız ikinci komanda olub.

2026-cı il sentyabrın 13-də keçirilən Mançester derbisində “Siti” 1:0 hesabı ilə qalib gəlib. Komanda matçın 23-cü dəqiqəsindən etibarən Fil Fodenin qırmızı vərəqə alması səbəbindən azlıqda mübarizə aparıb. 

Buna baxmayaraq, “Mançester Siti” qarşılaşmanın 60-cı dəqiqəsində Erlinq Haalandın qolu ilə hesabı açıb və sona qədər üstünlüyünü qoruyaraq “Old Trafford”dan üç xalla ayrılıb. 

Beləliklə, “Mançester Siti” bu xüsusi göstəricidə “Everton”a qoşulub. “Everton” 2025-ci ilin noyabrında İdrissa Qeye qırmızı vərəqə aldıqdan sonra “Mançester Yunayted”i 1:0 hesabı ilə məğlub etmişdi. 

Qeyd:
 “Everton”— 25 noyabr 2025
“Mançester Siti”—13 sentyabr 2026