Ronaldu yaşananlara aydınlıq gətirdi: “Məşqçi verdiyi sözü tutmadı”
Portuqaliya millisinin kapitanı Kriştianu Ronaldu son günlər yığma ətrafında yaranmış qalmaqala münasibət bildirib. 41 yaşlı futbolçu düşərgəni tərk etməsinin səbəbini açıqlayıb, komanda yoldaşlarından və Portuqaliya xalqından üzr istəyib.
Azmedia.Az xəbər verir ki, Səudiyyə Ərəbistanının “Əl-Nəsr” klubunda çıxış edən və komandanın kapitanı olan, beşqat “Qızıl top” sahibi Kriştianu Ronaldu Portuqaliya millisində yaşananlarla bağlı mövqeyini açıqlayıb.
Ronaldu bildirib ki, milli komandanın düşərgəsini tərk etmək qərarını ona verilən sözün yerinə yetirilməsindən əvvəl qəbul edib. O, təxminən 25 illik futbol karyerası ərzində heç vaxt məşqçilərin texniki və ya taktiki qərarlarına müdaxilə etmədiyini vurğulayıb.
“Mənə verilən sözün pozulmasını gözləmədən millinin düşərgəsini tərk etmək qərarına gəldim. Onlar bir ağızdan mənim yerimin millidə olduğunu deyirdilər. Demək olar ki, 25 illik karyeram ərzində heç vaxt hansısa məşqçinin hər hansı texniki və ya taktiki qərarlarına qarışmamışam”, - deyə Ronaldu bildirib.
Futbolçu düşərgəni icazəsiz tərk etdiyinə görə komanda yoldaşlarından və Portuqaliya xalqından üzr istəyib. Bununla yanaşı, ona verilən sözün tutulmamasının onun üçün əsas məqam olduğunu qeyd edib.
“Komandanın düşərgəsini tərk etdiyimə görə milli komandadakı yoldaşlarımdan üzr istəməliyəm. Portuqaliya xalqından bir daha üzr istəyirəm, lakin verilən sözün tutulmaması mənim üçün həlledici əhəmiyyət kəsb edir. Məşqçinin mənə verdiyi sözü pozmasına baxmayaraq, bu söhbətlərin şahidi olanların təsdiq edə biləcəyi kimi, mən belə hərəkət etməməli idim. Məsuliyyət tamamilə mənim üzərimdədir”, - Ronaldu deyib.
Norveçlə matçda nə baş verib?
Kriştianu Ronaldu Norveçlə qarşılaşma günü baş verənləri də ətraflı şəkildə izah edib.
Onun sözlərinə görə, görüşdən əvvəl baş məşqçinin köməkçisi ona yaxınlaşaraq Jorji Jezuşun futbolçu ilə danışmaq istədiyini bildirib. Daha sonra baş məşqçi Ronaldudan 30 dəqiqə oynaya biləcəyini soruşub.
Ronaldu bunun onun bərpa planına uyğun gəlmədiyini, buna baxmayaraq, məşqçinin istəyinə razılıq verdiyini söyləyib.
“Norveçlə matç günü məşqçinin köməkçisi yaxınlaşaraq baş məşqçinin mənimlə danışmaq istədiyini dedi. Məşqçi məndən 30 dəqiqə oynaya biləcəyimi soruşdu. Bu, mənim bərpa planıma uyğun gəlməsə də, dərhal razılaşdım. O mənə “hazır ol, 30 dəqiqə oynayacaqsan” dedi. Qalanı isə artıq tarixdir. İkinci hissədə isinmə hərəkətləri etdim, dəqiqələrin keçdiyini gördüm, lakin mənə şans verilmədi. Məşqçi verdiyi sözü tutmadı”, - deyə portuqaliyalı ulduz vurğulayıb.
Ronaldu həmçinin bildirib ki, klubunda yaxşı fiziki formada olduğu və qol vurmağa davam etdiyi müddətdə, cəzasını çəkdikdən sonra əvvəlki kimi Portuqaliya millisinin uğurları üçün mübarizə aparmağa hazırdır. Bu açıqlama onun milli komandanı birdəfəlik tərk etmək niyyətində olmadığını göstərir.
Qeyd edək ki, Kriştianu Ronaldu bu il də dünyanın ən çox qazanan futbolçusu olaraq qalır. “Sportico” portalının 2026/27 mövsümünün yekunlarına əsasən ən çox gəlir əldə edəcək futbolçularla bağlı hazırladığı siyahıda ilk sırada məhz Ronaldu qərarlaşıb.
Məlumata görə, “Əl-Nəsr”in hücumçusu meydandakı fəaliyyətindən 250 milyon dollar, meydandan kənar fəaliyyətindən isə 50 milyon dollar gəlir əldə edəcək.
